Nakighinun-anon ang kapulisan sa bar owners sa Mandurriao, Iloilo City agud nga mapasiguro nga mangin safe ang mga bar-goers kadungan sang Dinagyang Festival 2026.
Sa interview sang Bombo Radyo kay Police Captain Val Cambel, hepe sang Iloilo City Police Station 10, iya ginpahayag nga nakapasalig naman ang mga tag-iya nga magabulig sa pagpabilin sang kalinong kag katawhay, apang ginpahanumdom lang sa ila ang ila nga katungdanan.
Suno kay Cambel, gina-finalize man subong ang mga aktibidad para sa bouncer training para nga ma-edukar sila kag ma-refresh ang ila ihibalo agud mahibal-an nila ang dapat himuon kag ang ila limitasyon kun may sitwasyon nga nagakinahanglan sang ila serbisyo.
Magluwas diri, handa naman ang pulis nga magserbisyo para sa festival-goers nga magatambong sa ILOmination nga kinaandan ginahiwat sa Diversion Road.
Nagpangabay man ang pamunuan nga kun magkadto sa syudad agud mag-selebrar sang Dinagyang, ipaiway ang pagtuga sang gamo ukon pag-inaway ilabi na kun maka-inom.
Ginapangabay man nga likawan ang pagsuksok sang malahalon nga alahas kag pag-expose sang gadgets ukon iban pa nga malahalon nga gamit agud nga indi maka-engganyo sang mga kawatan.
