Handa ang Iran sa gyera batok sa Estados Unidos sang Amerika pananglitan mag-intra ini sa nagakatabo subong nga tensyon kag lapnagon nga hublag-protesta sa Tehran.
“If Washington wants to test the military option it has tested before, we are ready for it,” suno kay Iran Foreign Minister Abbas Araghchi.
Apang dugang niya, nagalaum siya nga pilion man sang US ang mas maalam nga desisyon nga amo ang dayalogo. Nagbuya man ini sang paandam batok sa mga nagasulsol sa US nga mag-intra sa gyera agud nga makaserbe para sa interes sang Israel.
Ini nga pahayag sang foreign minister ang kasunod sang komento ni US President Donald Trump nga ginakonsider sini ang “strong options” para sa Iran — lakip na ang potensyal nga military action.
Sang Domingo, nagpahayag man si Iranian Parliament Speaker Mohammad Bagher Ghalibaf nga ang US military kag Israel ang mangin “legitimate targets” kun manghilabot ang US sa ginamo subong sa Iran.
As of press time, nagdangat na sa 648 ang numero sang protesters nga napatay.
Nagpaandam man ang Norway-based human rights group nga magsaka pa ang death toll, apang mabudlay ang pagtipon sang beripikado nga impormasyon bangud sang nationwide communications blackout nga apat na subong ka adlaw.
Magluwas sa mga napatay, may 10,700 man nga ginpang-aresto.
Nagsabat naman una ang Iranian leaders nga ginasuportahan sang iban nga mga pungsod ang anti-government demonstrations. Gin-akusahan naman ni Iranian Supreme Leader Ayatollah Ali Khamenei ang US politicians sang “deception.”
Nagsugod ang protesta sa Iran sang Disyembre 28 sang naakig ang mga tawo bangud sang pagluya sang balor sang Iranian currency nga rial batok sa US Dollar sa Open Market.
Nagsarurot ang rial sa record low sang nagligad nga tuig, kag nagpanglakaak naman ang inflation sa 40% nga nagresulta sa pagsaka sang presyo sa adlaw-adlaw nga kinahanglanon kaangay sang cooking oil kag karne.
Sunod man nga nag-intra ang mga estudyante sa demonstrasyon. Madamo ang nagpanawagan sa pagbag-o sa pulitika. Lakip sa ginasinggit sang iban amo ang pagpamatok sa Supreme Leader sang pungsod.
Sandig sa US-based Iranian Human Rights Activists News Agency, naglapta na ang demonstrasyon sa 186 ka mga syudad kag banwa sa 31 ka mga probinsya sang pungsod.#
