Maga-updanay bilang hosts sa Miss Iloilo 2026 sanday Bb. Pilipinas Grand International Nicole Cordoves kag Miss Eco International 2025 Alexie Brooks.
Ini na ang ikaapat nga tuig nga mangin host sa sini nga event si Cordoves, samtang balik-entablado naman si Brooks matapos ginkoronahan nga Miss Iloilo sadtong 2024.
Suno pa sa Miss Iloilo Organization, maka-upod man sang duha ka beauty queens ang Ilonggo host nga si Ryl Nuñez.
Kumpirmado naman nga magapungko bilang judges sanday former Miss Iloilo kag Miss Universe Philippines 2020 Rabiya Mateo; visionary mentor kag “Queen Maker” nga si Jonas Gaffud; world-renowned shoe designer nga si Jose Joaquin “Jojo” Bragais; former IFFI President Joe Marie Layson Jr.; kag entrepreneur nga si Mags Cue.
Mangin special guest naman sa coronation night si Miss Universe Philippines 2023 Michelle Dee.
Isa ang Miss Iloilo sa highlights sang iconic nga Dinagyang Festival 2026. Matabo ang grand coronation night sa Sabado, Enero 17, sa West Visayas State University (WVSU) Cultural Center.
12 ka mga kandidata ang maga-compete para sa titulo subong nga tuig nga amo sanday Yamika P. Nagae sang Estancia, Wyncy Fatalino kag Mitch Samson sang Miagao, Lorraine Tajonera Mangubat sang Tubungan, Krshia Danica Ferguson sang Badiangan, Zestah Shalom Espinosa sang Anilao, Angel Ann Polines Teruel sang Tigbauan, Hana Tiffany Christen sang Janiuay, Mae Gatungay sang Guimbal, Gel Khyyzzll Zamora Gevero sang Iloilo City Proper, Jessica Patricia Lynn Beerda sang La Paz, Iloilo City, kag Mauluxielle Stacey De Ramos sang Batad.#
