Ginkumpirma ni Interior Secretary Jonvic Remulla nga nag-surrender na sa Philippine National Police (PNP) si anay Senador Bong Revilla.
Ini kasunod sang arrest warrant nga gindagdag sang Sandiganbayan 3rd Division sa iya kag sa anum ka iban pa kaangot sa non-bailable malversation case bangud sang maanomaliya nga proyekto sa Pandi, Bulacan.
Gindala ang anay senador sa Camp Crame subong nga gab-i, Enero 19.
Wala na ini sang ginpaguwa nga statement sa atubang sang media, apang sa iya Facebook Live video antes ang iya pa-surrender, nagpahayag si Revilla nga atubangon niya ang kaso kag nakahibalo siya suno sa iya nga indi siya pagpabay-an sang Diyos bangud wala man siya sang sala.
“Nakakalungkot po, parang wala yatang due process,” suno kay Revilla. Dugang niya, “Haharapin ko to nang walang takot. Alam kong hindi ako pababayaan ng Diyos, dahil wala akong kasalanan dito.”
Magluwas sa arrest warrant nga ginpaguwa sang Sandiganbayan, may hold departure order man batok kay Revilla kag sa anum ka iban pa nga mga personalidad kaangot sa non-bailable case nga malversation. Kaangot ini sa ginaalegar nga P92.8 million ghost flood control project sa Pandi, Bulacan.
Na-implicate si Revilla sa infrastructure corruption issue matapos ginpanglawag anay ni former Public Works Undersecretary Roberto Bernardo ang pangalan sang mga senador kag kongresista nga ginaalegar nakabaton sang kickbacks sa Department of Public Works and Highways (DPWH) projects.
Magluwas kay Revilla, ang iban nga respondents sa kaso amo sanday:
former DPWH Bulacan First District Engineering Office (DEO) assistant district engineer Brice Hernandez
former DPWH Bulacan First DEO Engr. Jaypee Mendoza
former DPWH Bulacan First DEO Engr. Arjay Domasig
former DPWH Bulacan First DEO Engr. Emelita Juat
former DPWH Bulacan First DEO finance section chief Juanito Mendoza
kag DPWH Bulacan First District Engineering Office cashier Christina Pineda
Sandig sa prosecution, naghimbunanay ang mga respondents agud nga ma-facilitate ang pag-release sang P76 million para sa pagtukod sang P92.8 million flood control project sa Pandi, Bulacan. Gindeklarar ini nga natapos na apang wala man gali na-implementar sandig sa inspeksyon kag sa testimoniya sang mga testigo.
Gin-alegar nga ginpeke sang respondents ang accomplishment reports, nag-isyu sang fraudulent billing documents, kag nag-endorso sang disbursement vouchers. #
 si anay Senador Bong Revilla.){kind=link}