Naghingyo ang kampo ni former President Rodrigo Duterte sa International Criminal Court (ICC) nga pahanugutan sila nga magdugang sang 108 ka dugang nga mga item bilang ebidensya.
Idugang nila ini sa ila gamiton sa confirmation of charges hearing nga maga-umpisa na sa Lunes, Pebrero 23.
Suno sa legal counsel ni Duterte nga si Atty. Nicholas Kaufman, importante ang ila idugang nga mga ebidensya sa patigayunon nga proceedings.
Ang ila request suno sa iya ang nag-ugat sa recent disclosures ukon mga ginpangbulgar sang prosecution.
“The present request is supported by good cause, and the Prosecution has confirmed to the Defence, this afternoon, in inter partes communications that the addition of these Items to the Defence List of Evidence causes it no prejudice,” kabahin sang request sang defense panel sa ICC Pre-Trial Chamber I.
Ginrason man sang defense ang nakabutang sa Article 61(6)(c) sang Rome Statue kun sa diin may kinamatarong ang suspek nga magpresentar sang ebidensya sa confirmation of the charges antes ang trial.
Ginpasalig man sang kampo ni Duterte nga wala man sang disbentaha sa prosecution ang ila nga request.
“No prejudice will stem from the inclusion of the Additional Items on the Defence List of Evidence… their inclusion would occasion no prejudice to the Prosecution, whereas their non-addition would cause significant prejudice to Mr Duterte,” dugang sa request ni Kaufman.
Dugang niya: “They are mostly transcripts and translations of transcripts of audio-video material. As such, the substantive volume of evidence sought to be added can be reduced by half.”
Pebrero 10 sang ginpasugtan man sang ICC Pre-Trial Chamber I ang nauna nga hingyo sang legal team ni Duterte kag sang prosecution nga magdugang sang mga ebidensya nga mahimo gamiton sa proceedings sa kaso ni Duterte nga crimes against humanity.
Naka-schedule na ang ICC Pre-Trial Chamber I sa confirmation of charges sa 80-anyos nga former president halin Pebrero 23-27.
Nagpadala naman sang sulat si Duterte nga nagasiling nga indi siya magtambong sa hearing bangud wala niya ginakilala ang hurisdiksyon sang ICC sa iya, kag bangud maluya na siya kag tigulang na kag malipatan man niya gilayon suno sa iya ang mga hambalan sa amo nga hearing.
