Ginpanginwala sang kampo sang South Korean singer, actress, kag television presenter nga si Sandara Park ang alegasyon nga nagagamit ini sang iligal nga droga.
Kasunod ini sang akusasyon nga halin mismo sa 2NE1 bandmate sini nga si Park Bom.
Suno sa team ni Dara, “groundless” ang alegasyon, apang nagakahangawa man ini sa ikaayong-lawas sang iya nga bandmate.
Matandaan nga gin-claim ni Park Bom nga gingamit lang siya nga cover-up agud nga indi masapubliko ang ginaalegar drug abuse ni Dara.
Sang 2010, gin-akusaran si Bom nga nag-import sang 82 pills sang Adderall. Gina-regulate sa South Korea ang amo nga drugs bangud sa amphetamine content.
Gin-dismiss ang kaso bangud gin-clarify sang singer nga gingamit niya ang bulong agud nga ma-treat ang iya nga Attention Deficit Disorder.
Sa iya naman alegasyon subong, ginpahayag ni Park Bom nga gingamit lang siya bilang scapegoat bangud si Dara ang matuod nga nagagamit sang drugs.
Matandaan nga natabo ang debut nanday Bom kag Dara bilang myembro sang K-pop girl group nga 2NE1 kaupod kanday CL kag Minzy.
Antes sa South Korea, nakilala anay si Dara sa Pilipinas paagi sa reality talent competition nga “Star Circle Quest” sang 2004 kun sa diin ginsuguran sini ang iya nga acting kag singing career.
Apisar sang global fame, nagabalik-balik ini sa Philippine television kag nakapungko man bilang judge sa 2016 talent competition nga “Pinoy Boyband Superstar,” kag gina-akomodar man sini ang guest appearances sa nagkalain-lain nga variety kag talk shows.#
