Hugton sang Department of Energy (DOE) ang monitoring bangud sa posible nga paghingalit sang iban nga negosyante sa tion nga tuman ka taas ang presyo sang produktong petrolyo.
Subong pa lang, gina-antisipar na sang ahensya ang posible nga hoarding kag profiteering sa baligyaanay sang petroleum products.
Sandig sa Republic Act (RA) No. 7581 ukon ang Price Act, ini nga mga buluhaton ang pareho nga ginakonsiderar nga price manipulation kag mahimo masilutan paagi sa multa kag pagkapreso.
Lakip sa dagdagan sang multa amo ang short selling, adulteration, hoarding, overpricing, kag misuse of allocations.
“Presidential Decree No. 1865, signed on May 23, 1983, which amends Batas Pambansa Blg. 33 also strengthens penalties for illegal acts involving petroleum products in the Philippines,” suno sa press statement sang DOE.
Pahayag naman ni Energy Secretary Sharon Garin: “We will not tolerate any attempt to take advantage of the current situation at the expense of Filipino consumers.”
Nagapakig-angot na ang DOE sa Department of the Interior and Local Government (DILG) kag sa Philippine National Police (PNP) para nga may tikang gilayon nga mahimo batok sa violators.
Sa Luzon kag Mindanao, may napasa na nga reports kaangot sa iregularidad sa fuel supply kag retail practices.
Kun basehan pa lamang ang tatlo ka adlaw nga trading sa Mean of Platts Singapore, ang presyo sang kerosene mahimo madugangan sang P28 per liter; diesel madugangan sang P15 per liter; kag ang gasolina mahimo madugangan sang P7 per liter.
Kabahin ini sang epekto sang pag-ibwal sang tension sa Middle East sang gin-atake sang US kag Israel ang Iran nga rason sang pagbalos sang Tehran kag paglapta sang missile attacks sa rehiyon.#
