10,000-man task force, ginahanda na sang DILG kun ipaaresto sang ICC si Bato

Ginahanda na sang Department of the Interior and Local Government (DILG) ang task force nga bug-usan sang 10,000 ka mga tawo para sa posible nga “dragnet” operation agud nga madakop si Senator Ronald “Bato” dela Rosa.

Iga-deploy ini nga grupo pananglitan nga yara na ang warrant of arrest sang International Criminal Court (ICC) batok sa senador.

Ginpahayag ini ni Interior Secretary Jonvic Remulla matapos nagguwa ang panibag-o nga report subong nga adlaw nga nagguwa na ang arrest warrant sang ICC batok kay Dela Rosa.

Sa inisyal nga impormasyon, yari naman sa Pilipinas ang mga tiglawas sang International Criminal Police Organization (Interpol) agud nga arestuhon ang senador.

Apang kun basehan si Secretary Remulla, wala pa ini sang impormasyon nga nabaton nga may yara na sang arrest warrant.

Suno man kay Department of Justice (DOJ) Spokesperson Atty. Polo Martinez, as of press time, wala pa sila sang nabaton nga impormasyon kaangot sa ginaalegar nga arrest warrant.

Base kay Secretary Remulla, sa ila nga monitoring, yara pa si Dela Rosa sa Davao region apang wala ini naghatag sang specific location.

Ang ila ginahanda nga dragnet operation amo ang large-scale police ukon security operation kun sa diin gina-deploy sang awtoridad ang mga personnel sa madamo nga areas sa kapareho nga tion agud nga matultulan kag madakop ang target.

Nahibaluan nga sang Nobyembre 2025, gin-anunsyo man ni Ombudsman Boying Remulla nga may kopya na siya sang arrest warrant sang ICC batok kay Dela Rosa. Halin sadto, wala na nagpakita si Dela Rosa sa tanan nga mga sesyon sang Senado.