Ginklaro sang aktres nga si Bella Padilla nga wala sila nagapareho sang iya tiyo nga si Robin Padilla sa ila tanan nga pagpati kag panindugan sa pulitika.
Gin-isyu ni Bella ang statement sa tunga sang mga bag-o nga development sa pulitika sa Pilipinas kun sa diin isa si Robin sa may pinakamatunog kag kontrobersyal nga pangalan.
Suno kay Bella, mapinasalamatan gihapon siya sa kaayo sang iya tiyo sa sa ila pamilya, apang ginpahayag man niya bisan magparyentehanay sila, wala ini nagakahulugan nga pareho man ang ila nga political beliefs.
“My uncle’s political affiliation has nothing to do with my personal beliefs and convictions. We are related but we manage to agree to disagree,” suno sa aktres.
Suno pa sa iya, madugay na nga tion nga wala gani sila nagakit-anay.
“I do not live close to my uncle. I haven’t seen Tito Robin until we shared the same call time last Friday. Before then, I saw him 3 years ago,” dugang niya.
Ginklaro man niya nga wala niya gin-impluwensyahan ukon ginduso ang pagkuha kay Robin sa primetime action-drama nga “Blood vs Duty.”
Paathag sang aktres, Disyembre pa lamang, nalakip na siya sa cast, samtang ang iya tiyo naman ang gindugang sa listahan sang mga aktor kasunod sang desisyon sang executive kag supervising producers sang show.
Ini nga klaripikasyon ang natabo sa tunga sang mga kritisismo sa pagkuha kay Robin sa amo nga show apisar sang mga political tensions nga nagakatabo subong sa Senado.
Sini lang nga semana, pila ka beses nga nangin kaundan sang headlines si Robin bangud sa iya pagpasingit kay Kiko Pangilinan; panindugan sa impeachment proceedings batok kay Vice President Sara Duterte; kag ginaalegar pagbulig kay Bato dela Rosa agud nga makapalagyo.
