DOJ, DILG, pareho nga wala sang impormasyon sa mga alegasyon nga nadakpan na si Bato

Pareho nga wala sang impormasyon ang Department of Justice (DOJ) kag ang Department of the Interior and Local Government (DILG) kaangot sa ginapahayag pagka-aresto kay Sen. Ronald “Bato” Dela Rosa.

Ini ang sabat sang duha ka ahensya halin sang naglapta ang istorya kahapon sang hapon nga nagaalegar nga nadakpan na ang pugante nga senador.

Sa press conference sang Justice Department, nagpahayag ang spokesperson nga si Atty. Polo Martinez nga wala siya sang makumpirma nga detalye sa amo nga alegasyon bangud wala pa sang nabaton nga report ang ahensya.

“I cannot confirm that information. At least, not yet. Wala pa po kaming natatanggap na nangyari ‘yan,” suno kay Martinez.

Ginklaro man ni Interior Secretary Jonvic Remulla nga sa bahin sang Philippine National Police (PNP), wala man sang nabaton nga kaangay nga impormasyon.

“As far as the PNP, we have no information to that effect,” pahayag sang tiglikom.

Sa bahin naman sang National Bureau of Investigation (NBI), “wala” man ang sabat ni Director Melvin Matibag sang ginpamangkot ini natuhoy sa amo nga reports.

“Hindi, wala. Sa amin wala. I don’t know kung sino nakahuli. Wala sa amin,” suno kay Matibag.

Sang ginpamangkot kun padayon ang manhunt, sabat sini: “Lagi naman.”

Matandaan nga sang Mayo 11, kadungan sang pagbalik ni Dela Rosa sa Senado, ginkumpirma sang International Criminal Court (ICC) nga nagpagwa na ini sang arrest warrant batok sa former PNP Chief.

Ini ang may kaangtanan sa iya papel bilang alleged co-perpetrator ni former President Rodrigo Duterte nga may kaso nga crimes against humanity sa ICC bangud sa iya drug war.

Sang Mayo 13 sang gab-i, may kontrobersyal nga lukpanay nga natabo sa Senado, kag sang Mayo 14 sang kaagahon, nakapalagyo si Dela Rosa paagi sa pagsakay sa salakyan ni Senator Robin Padilla.

Nanginwala naman si Padilla nga nagpalagyo sila bangud suno sa iya, bisan i-review sa CCTV, makit-an nga nagalakat lang sila sang amo nga tion.#