Ginpahanumdom sang Simbahan sa mga tumuluo ang pagtuo, pagsalig, kag pagkilala sa presensya sang Diyos sa tunga sang literal nga mga unos kag kabudlay sa pagpangabuhi.
Ini ang nangin sentro sang homily ni Rev. Fr. Jose Alberto Guillen, Priest Moderator sang Our Lady of Candles, nga amo ang main celebrant sa alas syete nga misa kaina sang aga sa Jaro Metropolitan Cathedral.
Ginbase ni Father Guillen ang iya homily sa istorya sang Ebanghelyo sang naglakat si Hesukristo sa tubig kag nagpakita sang iya gahum sa tunga sang kahadlok sang iya mga disipulo bangud sang unos. Ginpresentar man ang ginhimo ni San Pedro nga apisar sang iya pagsalig sang Ginuo, nagpangibabaw ang kahadlok sini sa tuman nga baskog nga hangin.
Sa sini nga istorya, ginpahanumdom sang Simbahan sa mga tumuluo nga i-sentro ang mata sa Ginuo kag indi sa kaugalingon nga kusog, bangud paagi sa Diyos, malampuwasan ang ano man nga pagpanghangkat.
Dugang sini, ang gilayon nga pagsabat ni Hesus matapos nagpangayo sang tabang si Pedro ang isa ka pahanumdom nga handa ang Ginuo sa pagsalbar sa katawhan.
Wala nagakadula ang presensya sang Ginuo sa kabuhi sang mga tawo, suno sa Simbahan, basta may yara lang sang madalom nga pagsalig sa Iya.
“Kun tam-an kita ka salig sa aton kaugalingon, ayawan gid kita. There must be a time when we recognize ang aton kaluyahon and call on Jesus, kay dira buligan kita sang Ginuo. When we remain in our pride kag magsiling kita nga “ah, sarangan ko ni tanan,” delikado kita. Lumson kita sang kabudlay sang kabuhi,” suno kay Father Guillen.
Ini nga mensahe sang Ebanghelyo, pahayag niya, ang dapat gid nga panumdumon ilabi na subong nga tion nga lapnagon ang epekto sang sunod-sunod nga bagyo, habagat, kag buhawi.
Sarang man ini ma-aplikar sa pag-atubang sa mga unos sa kabuhi kaangay sang problema sa pinansyal kag pamilya; ginamo sa pulitika; balatian; kag sunod-sunod nga mga kapaslawan.
“Wala sing kasiguruhan sa patag sang pulitika. Indi maintindihan ang nagakatabo. Ang pagtabon-tabon sang kamatuoran, nagapalala sang aton nga sitwasyon. Kag madamo pa nga mga butang nga nagapahadlok sa aton,” suno kay Father Guillen.
“We must listen to the words of Jesus: ‘Take courage. It is I. Do not be afraid.’ Yara ang Ginuo nga sarang naton mapalapitan. Yara ang Ginuo nga nagapalapit sa aton. Kilalahon naton Siya, pamatian naton ang Iya tinaga. ‘Magpakaisog kamo. Ako ini.’ We need this to be strong sa tunga sang pagtilaw sa aton kabuhi,” dugang pa sa homily.#
