Ginatudlo sang City Engineer’s Office nga ang manubo nga outfall, basura nga nagatipon kag outdated nga drainage system ang kabangdanan sang pagbaha sa pila ka barangay sa syudad sang Iloilo.
Sa interview sang Bombo Radyo kay City Engineer Mavi Gustilo, head sang Office of the Building Official, iya ginpahayag nga mas mataas ang lebel sang tubig sa creek kumpara sa outfall sang drainage system sa pila ka mga barangay sa syudad rason nga nagadugang ini sa posibilidad sang backflow kag pagbaha.
Nakita man sang City Engineer’s Office ang dako nga volume sang basura rason nga kinahanglan naman i-upgrade ang mga daan nga drainage system agud makaya ang mas daku nga volume sang tubig-ulan.
Ginrekomendar naman ni Gustilo ang pagbutang sang slope protection sa mga creek kag flood gate sa mga outfall nga masami naga-submerge.
Ini agud automatic nga magsira ang flood gate kon magsaka ang tubig kag malikawan ang backflow.
Kinahanglan man, suno kay Gustilo, ang dugang nga pumping station sa pila ka lugar sa syudad agud nga makapahagan-hagan sang pagbaha.
Nagahingyo man ang syudad sa Department of Public Works and Highways-6 sang dredging machine agud mapadalum ang mga suba kag creek.
Sa subong, ginahulat pa ang implementasyon sang Comprehensive Drainage Master Plan sang syudad.
Nahibaluan nga nagdangat sa 69 ka barangay ang ginbaha matapos ang mabaskog nga pag-ulan sang nagligad nga gab-i tubtob kaagahon, nga nakaapekto sa masobra 3,000 ka residente.
