Ang mapait nga eksperyensya ni Dr. Rogelio Florete sa sulod sang 72-ka adlaw nga pagka-kidnap sa iya sang 1989 ang nangin inspirasyon sini nga magbulig sa pagsolbar sang malawig na nga problema sa suplay sang tubig sa syudad sang Iloilo.
Ginpakigbahin ni Dr. Florete, chairman kag chief executive officer sang Flo Water Resources Iloilo Inc., ang iya personal nga eksperyensya bilang isa sa mga speaker sa Western Visayas Water Utilities Summit 2026 nga ginpatigayon kahapon nga adlaw, Oktubre 19, 2026.
Suno kay Dr. Florete, ginkidnap siya sang 1989 kag gindala sa kabukiran sang Cadiz, Negros Occidental, sa sulod sang 72 ka adlaw.
Samtang yara sa pagka-kidnap, kinahanglan ni Dr. Rogelio Florete nga maglakat sang malawig apisar nga naga-bubo ang ulan.
Ang pagkakita niya sang isa ka suba nagpahanumdom sa iya sang importansya sang tubig sa kabuhi sang tawo.
Sang maka-survive siya sa pagka-kidnap sadtong Nobyembre 14, 1989, nagpromisa siya nga idedikar ang iya kabuhi sa pagbulig sa tawo agud masiguro ang bastante kag masaligan nga suplay sang tubig ilabi na sa pumuluyo sang Iloilo City.
Sang 2011, nag-appeal ang Flo Water Resources Iloilo Inc. sa bidding para sa bulk water supply kag nagdaog sa ikaduha nga bidding matapos makanselar ang una.
Gin-athag man ni Dr. Florete ang importansya sang water right ukon permiso sa pagkuha sang tubig halin sa aprubado nga ginhalinan sini kaangay sang mga suba kag iban pa nga aprubado nga katubigan.
Nagpaandam man ini batok sa sobra nga pagkuha sang groundwater bangod mahimo ini magresulta sa sinkhole nga suno pa sa iya mahimo magpadaosdos sang duta kag magpasulod sang tubig-dagat nga mabudlay na ibalik sa kinadaan.
Ginpunto ni Dr. Florete nga kinahanglan ang responsable nga pagdumala sang natural resources, pag-amlig sa palibot kag malawig nga pagplano agud maprotektahan ang mga ginhalinan sang tubig agud makaambit man ang masunod nga mga henerasyon.
Pahayag pa ni Dr. Florete, handa nga magpasaka sang water production capacity ang Flo Water Resources (Iloilo) Inc. agud nga mabuligan nga masabat ang nagataas nga demand sang tubig sa Iloilo.
Gindugang pa sini nga nagaplano ang kompaniya nga mag-expand sang ila facilities apang kinahanglan nga ma-improve man ang distribution systems agud masiguro nga madamo sang tubig ang nagalab-ot sa mga konsumidor.
