May pwesto na sa Top 40 sang Miss World 2026 ang pambato sang Pilipinas nga si Asia Rose Simpson matapos ini nagpangibabaw sa Head-to-Head Challenge sa Asia kag Oceania continental group.
Ginpasalamatan ni Simpson ang suporta sa iya kag ang oportunidad nga magrepresentar sa Pilipinas. Suno sa iya, gamiton niya ang iya bag-o nga responsibilidad kag tingog agud makahatag sang inspirasyon sa mga tawo nga nagatan-aw sa iya.
“Thank you for allowing me to represent the Philippines. Thank you for giving me this responsibility and honor,” kabahin sang iya reaksyon. “I plan to use it to the fullest, and to use my voice to inspire those who are watching. Maraming, maraming salamat.”
Sa Head-to-Head Challenge, ginpakigbahin sang mga kandidata ang ila personal nga mga istorya kag mga adbokasiya.
Sa bahin ni Simpson, ginpakigbahin sini ang adbokasiya nga nagagamit sang saot kag sports sa pagtib-ong sang mental health sang mga kabataan kag pamatan-on.
Ginpamangkot man siya kun paano mahakos ang pag-umwad nga wala ginadula ang kultura.
Sabat ni Simpson, mahimo ma-promote ang kultura paagi sa social media, pageantry kag iban pa nga plataporma, apang importante gihapon ang simple nga mga butang nga mahimo sa matag-adlaw.
“Though we have many avenues of promoting our culture [like] social media, pageantry, [and] our spheres of influence, it will be the simple things that’ll save us: speaking our native language at the house, sharing stories of old to our children and grandchildren, or cooking recipes from our grandparents,” suno sa beauty queen.
Antes ang iya kadalag-an sa Head-to-Head Challenge, nakasulod man si Simpson sa Top 60 sang Miss World Top Model competition bisan pa sa iya runway mishap.
Target ni Simpson nga mahatag sa Pilipinas ang ikaduha nga Miss World crown matapos ini maangkon ni Megan Young sang 2013.
Pagahiwaton ang coronation night sang Miss World 2026 sa Septyembre 5.
