Nagtilipon ang mga abyan, himata, kag mga pinalangga sang kabuhi sang komedyante nga si Gil Aducal Morales ukon Ate Gay para sa “living funeral” event sa Forest Lake Memorial Parks sa Biñan, Laguna.
Sa social media post subong nga Huwebes, ginpakita sang comedian ang lokasyon nga naka-set up kaangay sang haya —kumpleto sang mga bulak kag may portrait pa ni Ate Gay .
“Celebration of Life … Undasko 2026,” nakabutang sa caption sini.
May separado man nga videos kun sa diin naghatag ang mga abyan sang ila mensahe sang pagpalangga kag pagpasalamat. Lakip sa naghatag sang “eulogy” para sa iya amo si Boobsie Wonderland kag ang content creator nga si Arman Salon.
Na-diagnose si Ate Gay nga may stage 4 cancer sang nagligad nga tuig.
May yara sang anonymous donor nga nagbulig sa iya sa radiation therapy sa Asian Hospital samtang may isa man ka fan nga nagpahulam sang condo unit sa malapit nga area agud mangin mas mahapos ang pagpabulong sang komedyante.
Pagkatapos sang anum ka adlaw nga treatment, makita na nga nagkupos ang bukol sa iya liog.
Sang Oktubre 2025, ginpaathag ni Ate Gay ang kabug-osan sang iya pagpabulong nga nagalakip sang 35 ka adlaw nga radiation therapy kag chemotherapy nga ginahimo lima ka beses kada semana.
Sang nagligad nga Nobyembre, ginpahayag ni Ate Gay nga natapos na niya ang iya radiation therapy kag chemotherapy.
Sa update sang Disyembre 2025, makita man nga nagtapan na ang bukol sa iya liog.
Sang Marso naman sini nga tuig, ginsapubliko sang komedyante nga isa si Heart Evangelista sa mga importante nga tawo nga nagasuporta sa iya samtang nagapakigbato siya sa cancer.
Sang Hunyo, ginpahayag sang komedyante nga wala na sang mga bukol sa iya liog kag ilong santo sa resulta sang Magnetic Resonance Imaging (MRI).
