Nagpanindugan ang Iloilo Provincial Government nga wala sang ghost ukon substandard sa mga infrastructure projects sang National Task Force to End Local Communist Armed Conflict baliskad sa pahayag sang progresibo nga grupo nga BAYAN Panay.
Ini may kaangtanan sa ka 16 proyekto sa Tubungan, Leon, kag Igbaras nga ginapahayag may ara sang mga ghost projects.
Suno kay Provincial Administrator Raul Banias, wala pa makumpleto tukod ang mga proyekto nga nagakaapektuhan sang malain nga tyempo, mabudlay kag sulodlon nga lokasyon sini, amo man ang pag-delay sa paghatod sang mga materyales.
Gin-athag man ni Banias kag base man sa report sang COA, 29 ka proyekto ang indi pa magamit kag nagakinahanglan sang dugang nga proyekto agud nga makumpleto.
Pahayag pa sang opisyal nga wala naghambal ang COA nga ginkawat ukon indi insakto ang pagpaguwa sang pondo kag na-delay lamang ini.
Gintawag naman ni Provincial Administrator Banias nga isa ka ”black propaganda” lamang ang nasambit nga alegasyon kag indi matawag nga pagpangawat sang pondo sang gobyerno.
Nagpangako naman ang Provincial government nga tapuson ang mga nabilin nga proyekto pag-abot sang 2028 gamit ang local funds.
Nagpasalig man sila nga sundon nila ang mga rekomendasyon sang COA, apang indi na sila magpasaka sang kaso batok sa BAYAN Panay bilang pag-respeto sa ”freedom of expression.”
