Nagsungka sa militar ang isa ka anay katapo sang rebelde nga nagserbe bilang Finance and Logistics Officer sang Puregold Platoon, Southern Panay Front – Komiteng Rehiyon-Panay.
Ini amo si alias Dandan, 47-anyos, residente sang Leon, Iloilo.
Suno sa 61st Infantry Battalion (61IB) sang Philippine Army, Oktubre 11 sang hapon sang nag-surrender si alias Dandan sa headquarters sang 61IB sa Camp Monteclaro, Barangay Igtuba, Miagao.
Dala sini ang isa ka Akkar Charles Daly 12-gauge shotgun.
Pagkaaga naman, kasunod sang impormasyon nga ginpakigbahin ni alias Dandan, natultulan sang mga katapo sang militar ang area sa Barangay Bucari, Leon kun sa diin natago ang gamit sang mga rebelde.
Lakip sa mga na-recover amo ang 45 magazines para sa M16 rifles; isa ka Type C anti-personnel mine; isa ka detonator; duha ka backpacks nga may unod nga personal nga kagamitan; isa ka Bagong Hukbong Bayan sweatshirt; nanuhay-tuhay nga medical paraphernalia; isa ka NPA song booklet; CPP anniversary postcards; kag isa ka duyan.
“The recovery of the arms cache, particularly the improvised explosive device and detonator, represents a significant development in the continuing efforts of government security forces to prevent potential threats to civilian communities and maintain peace and security in the province,” suno sa 61IB.
Ginpahayag man sang militar nga ang pagsungka ni alias Dandan nagapakita sang importansya sang padayon nga pagpakig-istorya, koordinasyon, kag pagbuligay sang government security forces sa pagpanawagan sa nabilin nga mga myembro sang armado nga grupo nga talikdan na ang rebelde kag magbalik sa sabak sang gobyerno.
Natugyan na ang anay rebelde sa kustodiya sang 61st Infantry Battalion para sa debriefing kag nagakaigu nga disposition nga santo sa existing procedures.#
