Naglab-ot na sa P8.57 bilyon ang halit kag kapierdihan sa sector sang Agrikultura sa pungsod bangud sa El Niño, suno sa Department of Agriculture.
Base sa pauna nga datos sang Department of Agriculture, naglab-ot na sa masobra 288, 000 ang naapektuhan, samtang masobra 291, 000 naman ka ektarya sang agricultural land ang naapektuhan sa nagkalain-lain nga rehiyon sa pungsod.
Pinakadako nga kapierdihan amo ang sa mais nga naglab-ot sa 5 bilyon pesos, samtang 2.95 bilyon pesos naman ang halit sa palay.
Ginkumpirma naman sang DA nga nakapain na ini sang 11.34 bilyon pesos nga balor sang bulig para sa mga naapektuhan nga mangunguma, lakip na diri ang binhi, fertilizer kag iban pa nga kinahanglanaon sang mga mangunguma.
Nagpain man ang DA sang 61.99 bilyon pesos nga action plan agud nga mabuhinan ang epekto sang El Niño sa suplay sang pagkaon kag pangabuhian sang mga Pilipino.
