Ini ang hugot nga mensahe sang Girl City Mayor nga panindugan ang responsibilidad kag mangin tingog sang katawhan, sa baylo nga magsalig lamang sa titulo bilang opisyal sang gobyerno.
Amo ini ang panawagan ni Alexa Jaci Bataan, Girl City Mayor kadungan sang sa Boys and Girls Week Celebration nag nagsugod kahapun, Oktubre 19 kag magatakop sa Oktubre 25.
Suno sa iya, ini ang isa ka aktwal nga eksperyensiya bilang estudyante sa matuod nga kahulugan sang leadership kag public service.
Dugang pa niya, ang 53 ka estudyante nga nagrepresentar bilang mga lider sang siyudad makatuon gid sang teamwork, communication kag iban pa nga kalidad sang isa ka lider.
Ginpabutyag man niya ang pagpasalamat sa Iloilo City Government, Rotary Club of Iloilo City kag sa mga kaangot nga organisasyon sa paghatag sang oportunidad sa mga kabataan nga maeksperyensyahan ang pagserbisyo sa komunidad.
Ginkilala man niya ang suporta sang iya pamilya, mga abyan, manunudlo kag coaches nga nagbulig sa ila para ma-enhance ang ila mga abilidad kag talento sa leadership.
Sa iya mensahe, ginpahanumdoman niya ang iya mga co-official nga magpanguna bilang maayo nga ehemplo kag hatagan sang pagkilala ang mga tawo nga nagbulig sa ila antes malab-ot ang nasambit nga oportunidad.
Dugang pa niya, ang pagserbisyo publiko indi lamang pag-angkon sang titulo, kundi isa ka katungdanan nga dapat tumanon paagi sa paggamit sang gahum agud mangin tingog sang katawhan kag may sinsero nga pagserbisyo sa tanan.
Text by: Bombo Cyrene A. Nasis
