Bantayan sang maayo sang mga personnel sang Western Visayas Transport Cooperative ang matuod nga nagapanag-iya sang Persons with Disability ukon PWD ID agud mapunggan ang pag-abuso sa discount nga ginahatag sa mga lehitimo nga benepisyaryo.
Sa interview sang Bombo Radyo kay Raymundo “Boyet” Parcon, chairperson sang Western Visayas Transport Cooperative, iya ginpahayag nga ila na nga usisaon kun matuod ang PWD ID sang mga pasahero nga nagapangayo sang discount paagi sa pagpresentar sang mga ini sang ila nga valid ID.
Mahimo man nga kuhaan sang litrato ang ID agud mabuligan sa pag-verify sang impormasyon.
Ini ang kasunod sang pagbuyagyag ni Senador Raffy Tulfo sa ginapahayag lapnagon nga paggamit sang peke nga PWD ID, nga suno sa mga report nagadala sang daku nga pagkalugi sa mga negosyo kag nagapahina sa pagpatuman sang mga pribilehiyo para sa mga lehitimo nga benepisyaryo.
May mga indibidwal man nga indi PWD kag indi man senior citizen apang nagapangayo sang discount paagi sa paggamit sang mga ID nga ginapatihan nga peke.
Suno kay Parcon, apisar nga magamay lamang nga buhin, nagakapierde naman sila sa transport sector kun padayon ini nga nagakatabo.
Nagpasalamat naman ang mga representante sang transport sector kay Senador Tulfo bangud sa pagbuyagyag sang amo nga isyu.
Nagalaum sila nga magapadayon ang mga tikang agud mapunggan ang amo nga pagpang-abuso.
Ginpahanumdom man nila ang publiko nga ang discount dapat ihatag sa mga pasahero nga matuod nga PWD ukon senior citizen na agud maprotektahan ang kinamatarong sang mga lehitimo nga benepisyaryo.
