Ginkwestyon ni Hon. Izabela Margaret Dimla, Girl City Vice Mayor sang Hua Siong College of Iloilo ang motibo sang mayorya nga paglimit sang legislative functions ni Vice Mayor Lady Julie Grace “Love-Love” Baronda.
Suno kay Dimla, indi lamang bangud counterpart siya ni Baronda kung ngaa nagpahayag siya sang iya kabalaka, kundi handum man niya nga mahangpan ang mga rason sa likod sang desisyon sang konseho.
“Honestly, I felt that it was unfair for me because while the legislative decision was already similarly implemented in Cebu, I believe that there should have been some evidence presented that this decision would be beneficial not only within the politics of the council itself, but also to the people,” pahayag ni Dimla.
Para kay Dimla, indi lang dapat matapos sa pagtan-aw kung may kaangay nga implementasyon sa iban nga siyudad ang pagdesisyon sang konseho, kundi kinahanglan man, suno sa iya, nga mapakita kung ano ang benepisyo sini sa publiko.
Gindugang ni Dimla nga ang tagsa ka desisyon sang konseho may kaangtanan sa kaayuhan sang mga pumuluyo, gani dapat pinsaron sang maayo kung ang paglimitar sang legislative privileges ni Baronda makabulig bala ukon mangin kabangdanan sang negatibo nga epekto sa publiko.
Ang pahayag ni Dimla may kaangtanan sa pag-adopt sang mayoriya sang DILG Legal Opinion No. 95, Series of 2025, kag ginlakip sa Internal Rules of Procedure (IRP) ang mga probisyon nga nagalimit sang legislative functions ni Baronda, lakip ang iya abilidad nga magsponsor ukon mangin author sang mga proposed ordinances kag resolution.
𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬
