Nagapati si Iloilo 5th District Board Member Atty. Rolex Suplico, Chairman sang Committee on Rules sa Sangguniang Panlalawigan, nga indi mandatory kag indi kinahanglan sundon sang Provincial Board ang Department of the Interior and Local Government (DILG) Legal Opinion No. 95, series of 2025, tuhoy sa gahum sang vice governors kag vice mayors sa lehislatura.
Suno kay Board Member Suplico, ginakonsidera niya nga permissive ang legal opinion, buot silingon, indi mandatory.
“Pwede sundon, pwede indi… Indi mandatory sa amon nga sundon ang opinion sang DILG,” pahayag ni Suplico.
Nasaad sa DILG Legal Opinion No. 95, nga napetsahan Agosto 1, 2025, nga ang vice mayors kag vice governors wala sang kinamatarong nga mag-introduce ukon mag-sponsor sang legislative measures, magpungko bilang chair ukon magserbe bilang myembro sang mga komitiba, magapartisipar sa mga debate ukon maka-deliver sang privilege speeches samtang nagapungko bilang presiding officers.
Suno kay Suplico, padayon nga ginakilala sang Sangguniang Panlalawigan si Vice Governor Nathalie Ann “Lee Ann” Debuque bilang myembro sang provincial legislative body, nga may gahom kag katungdanan nga daw kapareho man sang isa ka regular nga board member.
Pahayag niya, padayon nga nagapungko bilang Chairperson sa mga komitiba ang bise gobernador sang Iloilo, amo man naga-introduce sang legislative measures kag mga ordinansa, nagapartisipar sa mga debate kag nagapresentar sang committee reports.
Nagapanindugan ang natungdan nga may yara gid sang poder ang vice governor sa iya mga katungdanan bangud elected member ini sang provincial legislative council.
“Ang vice governor diri ya nahatagan gid namon poder katulad sang ordinary nga board member,” dugang pa ni Suplico.
Nagapati man ang nasambit nga board member nga wala sang rason nga islan ang subong nga practice bangud wala man sang court decision nga nagadeklara kun bala i-apply ang DILG legal opinion.
Wala naman ginakonsidera sang provincial board nga magpangayo sang abiso halin sa DILG bangud nagapati siya nga makahatag na sang guidance sa ila ang naga-eksister nga provisions sang Local Government Code.
Text by: Bombo Lynd-C Bade
