Gindeklarar sang Korte Suprema nga indi mahimo nga piliton ang empleyado nga magretiro antes ang mandatory retirement age nga 65 kun wala ini naga-ugyon sa kasugtanan.
Sa 22 ka pahina nga desisyon, ginpamatud-an sang First Division sang Supreme Court nga sa idalom sang Labor Code, mahimo magpili ang empleyado nga magretiro sa edad nga 60, apang ang mandatory retirement age ukon edad nga kinahanglan na magretiro amo ang 65-anyos.
“The Labor Code permits employers and employees to fix the applicable retirement age at below 60 years. Absent such an agreement, the retirement age shall be that fixed by law, and the above-cited law mandates that the compulsory retirement age is 65 years, while the minimum age for optional retirement is set at 60 years,” suno sa Korte Suprema.
Base sa court records, ilegal nga ginpahalin sang employer nga Colegio de San Juan de Letran-Laguna ang petitioner nga si Rodolfo C. Ondevilla matapos kabigon nga nag-expire na ang iya appointment sang mag-edad siya sang 60.
Nagpabor kay Ondevilla ang Labor Arbiter kag National Labor Relations Commission (NLRC), samtang ginpamatud-an man sang Court of Appeals (CA) nga ilegal ang pagkakas sa iya sa trabaho.
Bisan pa nga ginsiling sang CA ang sulat ni Ondevilla nga nagapahayag sang iya pag-ugyon nga magretiro epektibo Hulyo 31, 2020, gin-athag sang SC nga ilegal gihapon ang pagkakas sa iya bangud wala ginbaton sang eskwelahan ang mga kondisyon sa pagretiro nga ginpangabay sang empleyado.
Ginklaro sang Supreme Court nga ang optional retirement ukon boluntaryo nga pagretiro dapat nakabase sa pag-ugyon sang duha ka partido.
Kinahanglan nga hilway kag klaro ang pag-ugyon sang empleyado nga wala sang pagpamigos ukon pagpamahog, bangud ang pagbaton sa amo nga pagretiro nagakahulugan sang pag-surrender sang iya kinamatarong nga magpadayon sa trabaho.
“Considering that CSJL denied Ondevilla’s preference to retire on July 31, 2020, he is deemed to have been illegally dismissed from employment,” suno sa korte.
Ginmanduan sang SC ang eskwelahan nga bayaran si Ondevilla sang bug-os nga backwages ukon wala niya nabaton nga sweldo halin Agosto 29, 2019 tubtob Agosto 29, 2024, kag separation pay sa baylo nga ibalik siya sa trabaho.
Ginhatagan man siya sang retirement benefits para sa iya bug-os nga serbisyo halin Hunyo 16, 2004 tubtob Agosto 29, 2024, sang malab-ot niya ang mandatory retirement age nga 65-anyos.
Suno sa desisyon, ang kabug-usan nga kwarta nga dapat bayaran kay Ondevilla pagadugangan sang legal interest nga 6 porsyento kada tuig halin Agosto 29, 2019 tubtob nga mabayaran ini sing bug-os.
Ginsulat ni Associate Justice Ramon Paul L. Hernando ini nga desisyon nga ginpagwa sang Hunyo 2026 kag ginsapubliko sa social media subong nga Martes, Oktubre 27.#
