Ginsaway sang Commission on Audit (COA) ang delay sa pagkumpleto sang mga dokumento nga magasiguro sa kinamatarong sang mga benepisyaryo sa ila nga mga balay sa Iloilo River Plains Subdivision, samtang nabutang man sa alang-alang nga indi mabawi sang Iloilo City Government ang ₱54 milyon nga utang nga dapat bayaran sa National Housing Authority (NHA).
Base sa 2025 audit report, nagaistar na ang mga benepisyaryo sa ila nga mga balay apang wala pa sang pormal nga dokumento.
Ang proyekto ang nagatuyo nga maghatag sang balay sa 1,000 pamilya nga nagaistar kilid sang Iloilo River.
Suno sa COA, kalakip sa mga nagapanguna nga rason sa delay ang wala pa naaprubahan nga subdivision plan kag ang indi pormal nga pagsalyo sang NHA sa syudad sang mga natapos nga proyekto nga pang-imprastraktura.
Bangud sini, wala nakumpleto ang mga kinahanglanon nga dokumento para sa seguridad sang pag-istar sang mga benepisyaryo.
Sa idalom sang kasugtanan sang NHA, Iloilo City Government kag Office of Senator Franklin M. Drilon, mahimo nga pat-uron ang kinamatarong sang mga benepisyaryo paagi sa usufruct agreement, conditional contract to sell ukon iban pa nga paagi.
Apisar nagapanguna nga gintudlo sang COA ang indi pagtuman sang NHA sa mga obligasyon sini, ginpahayag sang audit body nga dapat mas hugot nga gin-monitor sang syudad ang pagsunod sang ahensiya sa kasugtanan..
Nagpaandam man ng COA nga mahimo mabudlayan ang syudad nga mabawi gikan sa mga benepisyaryo ang gasto sa duta, pagpauswag sang lugar kag pagtukod sang mga balay.
Ang mga nakolekta nga kwarta ang natalana nga gamiton sa pagbayad sang ₱54 milyon nga utang sa NHA.
Suno naman sa city government, nagpakig-angot na ini sa Home Development Mutual Fund o Pag-IBIG Fund agud makakuha sang mga pautang ang mga benepisyaryo kag mapadasig ang pagsaylo sang ownership sa ila.
Ginrekomenda man sang COA nga magtukod kag magpatuman ang Iloilo City Local Housing Office sang action plan agud mapadasig ang paghatag sang mga dokumento sa mga benepisyaryo kag mabawi ang mga gasto sang proyekto.
