Ginpaathag sang tag-iya sang taytay nga nagakonekta sa Barangay Ingore kag Barangay Ticud sa distrito sang La Paz ang pagpabayad sang lima ka pesos agud nga makaagi sa lugar.
Sa interview sang Bombo Radyo kay alyas Oca, iya ginpahayag nga sobra 30-anyos na ang taytay kun sa diin sang una yara lamang sa P3 ang ila nga sukot sa mga pumuluyo nga nag-agi sa lugar.
Apang, bangud nagmahal na presyo sang kawayan nga amo ang ginagamit nga materyales sang taytay, ginpasakaan man nila ang bayad sa P5.
Suno kay Oca, ila man nga ginapasiguro nga masarangan sang mga pumuluyo ilabi na sang mga estudyante ang presyo nga ila ginasukot.
Pahayag pa niya, ang kwarta ang ila kita ang ila ginagamit sa pang-adlaw-adlaw nga kinahanglanon sa sulod sang balay kag amo man ang ginagamit sa maintenance sang taytay.
Dugang pa niya, ginabulubanta nga 30 ka kawayan ang ginagamit sa taytay kun sa diin kada anum ka bulan ini nga gina-islan bangud nga nagakautod kag nagakagabok ang kawayan.
