Ginarekomendar ni Iloilo City Mayor Raisa Treñas ang paggamit sang LED blinker pins para sa mga street sweepers agud mas mangin visible sila sa mga motorista, ilabi na alas-tres pa lang sang kaagahon naga-umpisa na ang mga ini sa pagpanglimpyo.
Ang LED blinker pin ang isa ka gamay nga suga nga mahimo itakod sa uniporme ukon vest sang mga street sweepers.
Sa interview sang Bombo Radyo kay GSO Head Engineer Neil Ravena, ini ang ginapanugyan sang Iloilo City Government nga dugang nga safety measure para sa mga trabahador nga nagapanglimpyo sa kalsada samtang nagahulag ang trapiko.
Suno kay Engr. Ravena, lakip man sa mga ginarekomendar ang pagpasiguro nga mahatagan sang insurance ang mga street sweepers sa labing madali nga tion, agud may yara sila sang proteksyon sa tion ma-involve sila sa aksidente ukon iban pa nga insidente nga mahimo matabo samtang nagatuman sang ila katungdanan.
Pahayag pa niya, may gin-provide na nga insurance sang nagligad nga tuig, apang kinahanglan pa ini nga ipaathag sa City Legal Office bangud sa mga restriksyon nga may kaangtanan sa job order personnel kag sa mga regulasyon sa paggamit sang pondo sang gobyerno.
Samtang, ginapatuman ang alas-5 sang kaagahon bilang natalana nga oras sang pagpanglimpyo sa dalan.
Dugang pa ni Engr. Ravena, sa mga lugar naman nga mabug-at ang dalagan sang trapiko, ginarekomendar man niya nga gamiton na lamang ang sweeper trucks agud malikawan ang kabudlayan sa pagbutang kag pagbalhin sang traffic cones samtang nagapanglimpyo ang mga street sweeper.
Nahibaluan nga ini nga mga tikang ang ginpatuman sang Iloilo City Government kasunod ang separado nga vehicular accidents sang Oktubre 25 kun sa diin biktima ang duha ka personnel sang General Services Office.
Natabo ang duha ka insidente sa Airport, Mandurriao kag Avanceña, Molo.
Ginkumpirmar man ni GSO Head Neil Ravena nga nagtaliwan na ang babaye nga street sweeper nga nabuggoan sang motorsiklo sa Old Airport, Mandurriao bangud sa cervical fracture nga tuga sang impact sang pagbunggo sang motorsiklo.
Nahibaluan man nga nagmandu na si Iloilo City Mayor Raisa Treñas nga kasuhan ang driver nga nakadisgrasya sa street sweeper.
