Ginaabisohan sang Iloilo Provincial Health Office (PHO) ang publiko nga magpabilin nga safe kag healthy ilabi na sa pagbisita sa mga patyo kadungan sang pag-obserbar sang All Saints’ Day kag All Souls’ Day.
Sa interview sang Bombo Radyo kay Dr. Rodney Labis, chief sang Health Service Delivery Division sang Iloilo PHO, iya ginpahayag nga kinahanglan maplanohan na sang publiko ang pagbisita sa mga patyo agud malikawan ang pagpugok sang trapiko kag ang tuman nga init sang panahon.
Suno kay Dr. Labis, indi gid pagkalimtan nga mag inom sang madamo nga tubig, magkaon sa insakto nga oras kag magpahuway sa mga mahandong nga lugar agud malikawan ang dehydration kag heat-related illnesses.
Gina-engganyo man sini ang publiko nga hibaluon ang lokasyon sang mga first aid stations sa mga patyo nga pagabisitahan sa tion nga kinahanglan sang medical assistance.
Nagpaandam man si Dr. Labis nga magpabilin nga mahinalungon batuk sa dengue ilabi na nga may mga patyo nga may yara sang stagnant water sa diin mahimo pangitlogan sang lamok.
Ginpabug-atan man niya nga ang mga senior citizens, kabataan, nagabusong kag iban pa nga vulnerable individual ang dapat hatagan sang special attention sa diin kinahanglan may yara sila sang upod ilabi na kun madamo ang tawo kag mainit ang tyempo sa tion nga magbisita sa patyo.
Dugang pa niya, ginapanawagan ang mga local government units (LGUs) kag local health offices nga mangin handa sa ginalauman nga pagdagsa sang tawo sa mga patyo sa diin kianhanglan nga may mga first aid stations kag health personnel nga available nga mag-responde sa tion sang emerhensya.
