Isa gid ka dungog sang Iloilo ang Ilongga nagikan sa Brgy. Macatol, Pototan, subong nga kabahin sya sa 18 ka mga napilian para sa isa ka youth exchange program sa Japan.
Ini amo si Jennifer Erika Angeles nga magapasakop sa The Ship for Southeast Asian and Japanese Youth Program (SSEAYP) 2027.
Tinutuyo sini nga tipunon ang mga youth leaders sang ASEAN countries agud magpadulong sa Japan, Malaysia, Cambodia, kag Pilipinas para man nga mas mapaayo ang international cooperation pinaagi sa leadership seminars, regional discussions, kag homestay activities.
Sa interview sang Bombo Radyo kay Angeles, iya ginpahayag nga wala gid sya sadto sang ihibalo sa nasambit nga programa, apang dako ang iya pagpasalamat kanday Mark Gallego kag Dharyl Lutero nga nagpresentar sa iya sang nasambit nga youth exchange program nga ginbuksan sang National Youth Commission.
Suno sa iya, wala gid nya nalikawan nga magpaminsar sadto nga posible wala na sya nakasulod sa SSEAYP ilabi na nga pila na ka bulan ang nagligad sang nagpasa sya sang iya application kag wala pa sya nakabatun sang kumpirmasyon halin sa NYC.
Apang matapos ang pila ka bulan nga hulatanay, nabatun sini ang ginahulat niya nga mensahe kun sa diin sya lang ang nagaisahanon nga Ilonggo sa SSEAYP.
Ginpakigbahin man niya nga maid-id nga mga training ang ginahatag sa ila tubtob subong agud mapaayo pa ang ila nga mangin performance sa nasambit nga programa.
Suno man kay Angeles, isa sa mga dapat bantayan sang publiko amo ang ila Cheers and Yells performance bangud sa matinlo nga performances sang nagligad nga mga Filipino delegates.
Magalakat ang delegado sang pungsod sa Enero 3 para sa SSEAYP 2027 kun sa diin magabisita man sila sa pila ka mga ASEAN Countries lakip na ang Pilipinas.
