Gina-monitor na sang City Health Office ang kaso sang dengue, mga waterborne kag heat-related diseases sa tion sang El Niño.
Sa interview sang Bombo Radyo kay Dr. Roland Jay Fortuna, Assistant Department Head sang City Health Office, iya ginpahayag nga nagapanguna gid nga ginatutukan ang nagataas nga kaso sang dengue ilabi na nga walo na ang narekord nga patay subong nga tuig.
Ginpaathag ni Dr. Fortuna, nga kun mainit ang tiempo, mas agresibo ang mga lamok nga nagadala sang dengue gani nagadamo ang kaso.
Sa bahin naman sang mga water-borne diseases, ginpahayag ni Fortuna nga bangud kulang ang suplay sang tubig, nagakapilitan ang iban nga residente nga magkonsumo sang tubig nga halin sa indi safe nga sources.
Apang sa subong, indi pa man madamo ang kaso tuhoy sa nasambit nga mga balatian.
Sa mga heat-related diseases naman, ginsiling ni Fortuna nga padayon pa ang ila pagtipon sang data.
