Responsibilidad sang isa ka Kura Paroko nga siguruhon ang kaluwasan sang tagsa ka sumilimba lakip man ang estado sang simbahan.
Sa interview sang Bombo Radyo Iloilo kay Msgr. Meliton Oso, direktor sang Jaro Archdiocesan Social Action Center ukon JASAC, ginpahayag niya nga kabahin ini sang responsibilidad sang isa ka administrador nga amligan ang mga sumilimba kag ang pagmentinar sang istruktura sa sulod sang simbahan.
Ginpaambit niya man nga kinahanglan sang Kura Paroko nga maghimo sang nagakaigo nga tikang kag solusyon ukon magpatigayon sang pagpangusisa sang iya mismo responsibilidad.
Ginpunto man ni Msgr. Oso nga indi na paghulaton nga magdako pa ang deperensya ukon ang problema antes hatagan sang solusyon ukon magpatigayon sang nagakaangay nga lihok.
Nagpasalamat man siya sa Archdiocese sang Manila bangud nagpagwa sila sang ‘circular’ ukon ang gilayon nga safety inspections sa tanan nga archdiocesan churches, eskwelahan, kag mga church-run institutions.
Nahibaluan nga sa amo nga circular nga napetsahan Nobyembre 3, ginmanduan ang mga parish priests nga i-check ang mga building, electrical systems, kag fixtures sa posible nga safety risks.
