Ginklaro sang Philippine National Police nga wala sila sang na-monitor nga anuman nga seryoso nga security threat kaangot sa nagahilapit nga 2026 ASEAN Summit sa pungsod nga patigayunon na sa masunod nga tuig.
Suno kay PNP Chief Police General Jose Melencio Nartatez Jr., may magamay lamang nga butang nga kinahanglan nila nga kay-uhon.
Sa pihak sina, ginpunto ni Nartatez nga indi sila dapat magpakampante sa pihak sang mayo nga sitwasyon, ilabi na nga ginalauman ang pag-abot sang nagkalain-lain nga lider halin sa iban nga pungsod nga parte sa ASEAN.
Agud masiguro ang kaayuhan, ginatingwaan sang kapulisan ang pagpakig-angot sa mga local government kag iban pa nga ahensya kun sa diin nakatalana nga patigayunon ang mga opisyal na aktibidad.
Apisar wala pa ginpaidalom sa formal alert status, ginpasiguradi sang kapulisan nga nakahanda sila nga pahulagon ang bilog nila nga pwersa agud nga mahatagan sang mabakod kag masaligan nga seguridad ang nasambit nga international event.
