Nakarekord sang 3,293 ka road crash incidents sa probinsya sang Iloilo halin Enero tubtob Hunyo ukon first semester sang 2026, sandig sa data sang Iloilo Police Provincial Office (IPPO).
Sa nasambit nga numero, 110 ang napatay bangud sa mga aksidente sa dalan, samtang 274 ang nag-angkon sang major injuries kag 1,547 ang may minor injuries.
May yara man sang 869 ka pasyente nga naospital.
Sandig sa dat, ang reckless driving amo ang nagapanguna nga na-identify nga rason sang mga aksidente, nga may 2,914 ka kaso.
Ginsundan ini sang pagmaneho sa idalom sang impluwensya sang alkohol ukon droga nga may 97 ka kaso, mechanical defects nga may 73, road under construction nga may 33, weather conditions nga may 28, overspeeding nga may 18 kag road rage nga may 13.
Samtang, motorsiklo ang may pinakadamo nga na-involve sa mga road crash nga nagalab-ot sa 1,977 ka units.
Ginsundan ini sang four-wheeled vehicles nga may 1,925, tricycle nga may 416, six-wheelers and above nga may 246 kag bicycles nga may 61.
Naglab-or naman sa 2,514 ang mga kaso sang property damage bangud sa mga aksidente.
Nagapakita ang data sang padayon nga problema sa road safety sa probinsya, ilabi na ang mga aksidente nga may kaangtanan sa reckless driving.
Ginapahanumdom ang mga motorista nga i-observe ang traffic rules, likawan ang pagpadalagan sang tuman kadasig kag indi magmaneho kun nakainom sang makahulubog nga ilimnon agud malikawan ang aksidente kag pagkapatay.
