Padayon nga ginapangita sang Dueñas Municipal Police Station ang gunman kadungan sang pagpatay sa isa ka lending company manager sa Barangay Ponong Grande, Dueñas, Iloilo sang Myerkules, Nobyembre 4.
Ini matapos nga nadakpan na ang ginaalegar driver nga si alias Bongbong nga taga-Barangay Sablogon, Passi City.
Sa interview sang Bombo Radyo kay Dueñas Mayor Robert Martin Pama, iya ginpahayag nga partially closed na ang kaso, apang padayon gihapon ang operasyon sang kapulisan agud madakpan ang suspek nga nagtiro sa biktima nga ginkilala kay alias Roy, 36-anyos, residente sang Man-it, Passi City.
Suno kay Pama, indi pa mahimo nga ipaathag sa media kag publiko ang mga detalye sang ila operasyon bangud indi nila luyag nga mabutang sa peligro ang padayon nga imbestigasyon.
Dugang pa sang alkalde, may yara pa sang nagkalain-lain nga anggulo nga ginasunod ang mga otoridad, apang nauna na nagsiling ang pulis nga posible nga work-related kag personal grudge ang rason.
Madumduman nga sang nagluntad ang krimen, duha ka indibidwal nga sakay sa motorsiklo ang nagtiro sa manager nga nakaagum sang madamo nga pilas sa nagkalain-lain nga parte sang iya lawas.
Natigayon naman nga napasaka ang kaso nga murder batok kay alias Bongbong kag sa isa ka John Doe.
Samtang, ginpasiguro naman ni Mayor Pama sa mga pumuluyo nga wala sila sang dapat ikabalaka bangud padayon ang pagpatrolya kag pagpatigayon sang mga checkpoint operation sang kapulisan kag lokal nga panguluhan agud mapabilin ang kalinong kag seguridad sa banwa.
