Nagapadayon pa ang construction sang flood mitigation structures sa Barangay Alalasan, Lapuz, Iloilo City apisar natapos na ang completion date nga nakabutang sa project billboard.
Base sa project information board, ang proyekto nga may titulo nga “Construction of Flood Mitigation Structures Within Iloilo City” may contract cost nga ₱102,798,574.13 kag ginpatuman sang F. Gurrea Construction, Inc.
Nag-umpisa ang proyekto sang Pebrero 20, 2025 kag natalana kuntani nga matapos sang Enero 8, 2026, sa idalom sang DPWH Iloilo City District Engineering Office.
Apang makita nga nagapadayon pa ang construction work sa lugar.
May mga excavator kag construction equipment nga nagatrabaho, samtang ang dalan napuno sang lutak kag nagatipon nga tubig.
Makita man ang mga excavation materials kag construction debris sa kilid sang dalan, nga nagahatag sang kabudlayan sa pag-agi sang mga salakyan lakip na ang mga motorsiklo, mga nagabyahe nga traysikad kag mga residente.
Bangud naglapaw na sa completion date apang may construction activities pa sa lugar, nagapamangkot ang publiko kun san-o ini matapos kag kun ano ang rason sang pagka-delay sang proyekto.
Bukas ang Bombo Radyo sa pahayag sang DPWH tuhoy sa status sang proyekto, rason sang delay, kag bag-o nga target completion date.
Text by: Bombo Lynd-C Bade
