Naglab-ot sa 86 ka barangay sa Iloilo City ang ginakabig nga may mataas nga kaso sang Children-at-Risk (CAR) kag Children in Conflict with the Law (CICL), base sa district profiling sang City Social Welfare and Development Office (CSWDO).
Ini ang ginpresentar ni Assistant CSWDO Officer Merlyn Gison sa Media Forum and Press Conference on Child Protection subong nga adlaw, Nobyembre 9.
Base sa datos, pinakadamo ang City Proper nga may 14 ka barangay, ginsundan sang Mandurriao kag Molo nga may 13 ka barangay.
May 10 naman ka barangay sa Jaro I, Jaro II kag La Paz, samtang walo sa Arevalo kag walo man sa Lapuz.
Samtang, sa case metrics sang CSWDO, nagapakita nga 253 ka CAR cases kag 91 ka CICL cases ang na-record sang 2024.
Sang 2025, nag-nubo sa 160 ang CAR cases, apang nagsaka sa 157 ang CICL cases.
Sa ikatlo nga quarter sang 2026, naglab-ot naman sa 247 ang na-catalog nga CAR cases citywide kag 132 ang reported CICL cases.
Sa pihak sini, 62% sang CICL cases ang naresolbar paagi sa Diversion Committee kag Katarungang Pambarangay.
Sandig man sa datos sang CSWDO, 8.5% sang CICL cases ang nagalakip sa mga teenager nga lalaki nga nagaedad 14 tubtob 17 anyos.
Samtang, agud mapabaskog ang proteksyon kag intervention sa mga kabataan, ginlunsyar sang CSWDO kag Iloilo City Council for the Protection of Children (ICCPC) ang Project GABAY sang Oktubre 13, 2026.
Pinaagi sa programa, target nga mahatagan sang intervention ang 200 ka CAR, 80 ka CICL, 250 ka pamilya, ginikanan kag guardians, kag 82 ka Barangay Councils for the Protection of Children (BCPC).
Text by: Bombo Cyrene A. Nasis
