Nagapanguna ang theft kag robbery nga mga kaso nga ginakaulamidan sang mga kabataan sa Iloilo City.
Ini sandig sa datos sang Top Offense Distribution kalakip ang Children in Conflict with the Law (CICL) kag Children at Risk (CAR) nga ginpresentar sang City Social Welfare and Development Office (CSWDO).
Base sa datos, 38% ang property offenses, nga nagalakip sang theft kag robbery, samtang 27% naman ang status offenses pareho sang paglapas sa curfew, truancy ukon pag-absent sa eskwelahan, kag paglapas sa mga ordinansa.
Nagasunod ang physical injury kag assault nga may 18%, samtang 11% ang substance and drug-related exposure.
Samtang, 6% ang cyber or online harms, nga nagalakip sang Online Sexual Abuse and Exploitation of Children (OSAEC).
Sa analytical findings nga ginpresentar man sang CSWDO, ginatudlo nga isa sa posible nga rason sa pag-angot sang mga out-of-school youth sa economic offenses amo ang financial distress ukon kabudlayan sa pinansyal nga kahimtangan.
Ginkabig man nga early warning signs ang mga status violations nga nagapakita sang kahimtangan sang mga kabataan nga masami yara sa vulnerable situations.
Dugang pa diri, ginpabutyag ni Assistant CSWDO Officer Merlyn Gison ang kinahanglanon nga mapabaskog ang digital monitoring sa mga barangay agud matutukan ang online exploitation kag iban pa nga cyber-related risks nga nagabutang sa katalagman sa mga kabataan.
Text by: Bombo Cyrene A. Nasis
