Natuslok sang nagalabaw nga kabilya ang isa ka driver sang tricycle matapos ini nga mabunggo sa kabilya sang isa ka gina-stock nga box culvert, sa Barangay Divinagracia, La Paz.
Suno sa impormasyon, idul-ong kuntani sang driver ang iya tiya nga senior citizen sa Barangay Alalasan sang nabunggo ang tricycle sa semento nga box culvert sa pihak nga lane sang karsada.
Bangud sa impact sang pagkabunggo, nagbalang-balang ang tricycle kag natuslok ang driver sang kabilya, nga nagresulta sa manabaw nga pilas sa iya dughan.
Napilasan man sa ulo ang iya upod nga senior citizen kag gindala sila sa ospital para sa nagakaigo nga pagbulong.
Madumduman nga padayon sa karon ang drainage construction project sa Barangay Alalasan, La Paz, nga malapit lamang sa Barangay Aguinaldo.
Ang mga pre-cast U-drain ukon box culvert nga ginapangreklamo sang mga residente amo ang mga materyales nga gin-gamit sa amo nga proyekto kag ginpangbutang anay sa dalan halin Aguinaldo pakadto Divinagracia.
Gina-apelar sang mga residente nga mahatagan sang nagakaigo nga aksyon ang pagtipig sang mga materyales sa dalanon, ilabi na ang pagbutang sang warning signs kag safety barricades agud malikawan ang masunod pa nga aksidente.
Text by: Bombo Jay Panizales
