Ginapanawagan sang SK Federation sang Iloilo City ang responsable nga pagpahayag sang opinyon sa tunga sang Iloilo City kag Iloilo Provincial Government agud indi madalahig ang mga pamatan-on sa tensyon sang duha ka LGU.
Ini matapos nagpadala sang sulat ang grupo kay Provincial Governor Arthur “Toto” Defensor Jr. tuhoy sa sunod-sunod nga Facebook posts ni Public Information and Community Affairs Office (PICSO) Head Jose Nereo Lujan nga ginakabig nila nga nagapakita sang pagkontra batok sa siyudad.
Sa interview kay SK Federation President Jelma Crystel Implica, indi nila tuyo nga limitahan ang freedom of expression, kundi ipahanumdom nga dapat may kaangtanan sa accountability kag responsibilidad ang tagsa ka pahayag, ilabi na sang mga opisyal nga may impluwensya sa publiko.
Dugang pa niya, indi nila gusto nga magresulta sa pagkabahinbahin sang mga Ilonggo ang sitwasyon, bangud masami nga ang mga pamatan-on ang mahimo maapektuhan sini.
Text by: Bombo Cyrene A. Nasis
