Nagpahayag sang kabalaka ang Sangguniang Kabataan (SK) Federation of Iloilo City nahanungod sa pila ka Facebook posts ni Jose Nereo Lujan, head sang Public Information and Community Affairs Office (PICAO) sang Iloilo Provincial Government, nga suno sa ila nagapakita sang hostility ukon negatibo nga paglantaw sa Iloilo City.
Sa sulat nga ginpadala kay Iloilo Governor Arthur “Toto” Defensor Jr. nga napetsahan October 28, 2026, kag gin-receive sang Governor’s Office sang November 4, 2026, ginpahayag ni SK Federation President Hon. Jelyna Krystel C. Implica ang ila concern sa posible nga epekto sang amo nga mga social media posts sa publiko.
Apang wala nasaad sa sulat kun ano nga mga post ni Lujan ang ginatumod sang SK Federation sang Iloilo City.
Suno sa Federation, importante nga mapabilin ang maayo nga relasyon sang Iloilo City kag Iloilo Province, nga dugay na nga nagabuligay sa nagkalain-lain nga programa kag proyekto para sa kaayuhan sang mga Ilonggo, ilabi na sang kabataan.
Ginkilala man nila nga apisar may nagkalain-lain nga mandate, identity kag autonomy ang duha ka local government units, nagakadapat magpadayon ang cooperation, mutual respect kag constructive dialogue para sa common good.
Apang, sandig sa sulat, nagakabalaka ang Federation nga ang pila ka Facebook posts ni Lujan mahimo makadugang sa confusion kag division sa tunga sang mga pumuluyo.
Ginpahayag man sang SK Federation nga indi nila tuyo nga punggan ang freedom of speech ukon ang kinamatarong sang bisan sin-o nga magpahayag sang personal nga opinyon.
Ginkilala nila ang constitutional right ni Lujan sa freedom of speech and expression.
Apang ginpunto nila nga dapat may yara sang responsibility kag accountability ang paggamit sang amo nga freedom, ilabi na kun ang isa ka tawo may public position kag impluwensya sa paghulma sang public opinion.
Gani, nagpanawagan ang SK Federation sang mas responsable nga paggamit sang social media, ilabi na sa mga nagahatag sang impormasyon sa publiko.
Ginpahayag nila nga ang sulat indi dapat paglantawon bilang pag-umpisa sang conflict, sa baylo isa ka panawagan para sa respeto, accountability kag responsible communication.
Ginpabutyag man sang Federation ang paglaum nga ang mga indi paghangpanay mahimo masolbar pinaagi sa meaningful dialogue kag magapabilin ang kooperasyon sang Iloilo City kag Iloilo Province para sa kaayuhan sang mga Ilonggo kag sang masunod nga henerasyon.
Text by: Bombo Lynd-C Bade
