Gina-imbestigaran na sang Iloilo Provincial Hospital Management Office ang kamatayon sang isa ka baby boy nga pila pa lamang ka adlaw nga ginbata sa Sara District Hospital sa banwa sang Sara.
Sa interview sang Bombo Radyo kay HMO head Atty. Yoko Marie Eguia, iya ginpahayag nga nakabaton sila sang report paagi sa email halin sa isa ka concerned citizen angut sa natabo nga pagkapatay sang lapsag sa nasambit nga hospital.
Suno sa iya, nagpatigayon na sang urgent meeting ang ila opisina kag ang hospital chief sang hospital agud matipon ang mga impormasyon kag mahibaluan ang mga sirkumstansya sa likod sang kamatayon sang lapsag.
Apang, ginpahayag man ni Atty Eguia, nga indi pa makahatag sang dugang nga detalye ang ila opisina bangud nagapadayon pa ang ila nga pag-usisa sa insidente.
Pahayag pa niya, plano man sang opisina nga makig-angot sa pamilya sang bata agud mahibaluan ang ila bahin kag kon ano ang mahimo nga tikang ukon bulig sa pamilya.
Dugang pa ni Atty. Eguia nga pagasiguraduhon sang opisina nga ma-imbestigahan sang mayo ang nasambit nga insidente amo man ang pagpasiguro nga indi na maliwat ang kaangay nga hitabo.
