Magapaidulom sa heightened alert status ang Philippine Coast Guard (PCG) Iloilo Station para sa pag-obserbar sang pista minatay subong nga tuig.
Sa interview sang Bombo Radyo kay Ensign El John Ga, spokesperson sang PCG-Iloilo Station, iya ginpahayag nga kabahin ini sang ila operational plan Undas 2026 agud masiguro ang hapsay kag hilway ang pagbiyahe sang publiko.
Suno sa iya, maga-deploy ang coast guard Iloilo Station sang ila kapin 200 ka personnel sa nagkalain-lain nga pantalan sa siyudad kag probinsya sang Iloilo sa Nobyembre 1 tubtob 2 kun sa diin amo ang mga adlaw ang ginalantaw nga mas madamo sang pasahero ang magabyahe.
Pahayag pa niya, pabaskugon sang ahensya ang seguridad sa mga pantalan kag terminal paagi sa koordinasyon sa iban nga concerned agencies.
Magapahamtang man ang coast guard sang Passenger Assistance Center ukon help desk sa mga nagapanguna nga pantalan agud makabulig sa mga pasahero nga may yara sang mga concerns ukon kinahanglanon.
Ginpahayag ni Ensign Ga, sa Iloilo City, tutukan ang Parola Wharf, Lapuz RoRo Wharf kag Fastcraft Terminal.
Samtang sa probinsya, pagabantayan naman ang mga pantalan sa banwa sang Dumangas kag Ajuy.
Dugang pa niya, ginapaniguro sang PCG-Iloilo Station nga preparado ang ila personnel agud nga maghatag sang serbisyo para sa hilway kag safe nga byahe sang publiko.
