Ginkwestyon ni Atty. Lorna Kapunan sang prosecution panel kun may pahanugot paagi sa board resolution sang duwa ka korporasyon ang ikaapat nga testigo sang defense panel nga si Atty. Suzette Balucanag-Punay, corporate counsel sang GenCorp Industries Inc. kag Metro City Chow.
Katuyuan sang paghatag sang testimonya ni Punay nga pamatud-an nga indi stockholder, opisyal ukon miyembro sang board of directors sang GenCorp si Duterte.
Suno kay Kapunan, importante ang nasambit nga resolusyon agud indi magamit sang testigo ang attorney-client privilege bilang rason agud indi pagsabton ang mga pamangkot.
Dugang ni Kapunan, wala man ang pangalan ni Punay sa General Information Sheets, financial statements ukon articles of incorporation sang kompaniya.
Paathag naman ni Atty. Justin Gular sang depensa, nagtambong ang testigo bangud sa subpoena sang impeachment court gani wala nagakabagay ang nasambit nga pagkwestyon ni Kapunan.
Samtang, gintugutan naman ni Presiding Officer Francis “Chiz” Escudero si Punay nga magtestigo, sa pagpati nga may yara siya sang nagakaigo nga otorisasyon.
