Dako ang posibilidad nga ipasaka sang defense team ni Vice President Sara Duterte sa Supreme Court ang nangin desisyon sang Senate Impeachment Court nahanungod sa voting threshold nga kinahanglan para sa conviction.
Suno kay defense counsel kag spokesperson Atty. Michael Poa, isa ka “real possibility” ang pagdangop sa Supreme Court matapos nga ginbag-o sang Senado ang patakaran sa pagboto.
Suno kay Poa, wala pa sila nakadesisyon kon san-o nila ini ipresentar sa Supreme Court bangod kinahanglan pa nila idangop kay Duterte ang ini nga plano.
Ginpahayag man niya nga may mga dokumento pa nga kinahanglan nga ipreparar, lakip na ang certified copies sang transcripts, stenographic notes, journals kag iban pa nga record.
Suno kay Poa, ginarespeto sang defense team ang desisyon sang mga senator-judge, apang wala ini nagapugong sa ila nga maggamit sang mga legal remedies nga yara sa idalom sang layi.
