Wala sang pagbag-o sa air fares sang mga byahero sa Oktubre samtang nagapadulong sa tigkalalag sa Nobyembre kag Christmas holidays sa Disyembre bangud nga wala man ginabag-o sang gobyerno ang fuel surcharge.
Sa isa ka advisory, ginsiling sang Civil Aeronautics Board (CAB) nga ang fuel surcharge magapabilin sa Level 4 para sa ikatlo nga sunod-sunod nga bulan tubtob Oktubre.
Sa Level 4, ang airlines mahimo makakolekta sang fuel surcharge nga P117 tubtob P342 para sa domestic flights kag P385.7 tubtob P2,867.82 para sa international trips, depende sa kalayuon.
Base sa pag-monitor sang International Air Transport Association, ang jet fuel prices nagtaas sang duwa ka porsyento sa $89.33 per barrel as of Sept. 12.
Sa Asia-Pacific, ang mga presyo nagtimbuok man sa $86.46 kada barrel.
Nagapangabay ang CAB sa mga carriers nga nagaplano nga magkolekta sang fuel surcharge nga magsulat sang application sa ahensya antes ang Oktubre.
Nahibaluan nga ginaantisipar ang flight demand nga magtimbuok sa fourth quarter bangud sa ginalauman nga magbyahe sang mga Pilipino sa sini nga mga binulan.
