Nagsaka si Alex Eala sa pinakaulihi nga rankings sang Women’s Tennis Association (WTA) apisar nalutos ini sa Round 2 sang 2025 US Open sa New York.
Nagsulod ang Filipina tennis star sa tournament nga nagapang-75, apang nagtaas na ini subong sa no. 69. Kasunod ini sang iya maragtason nga kadalag-an sa first-round sa iya debut sa main draw.
Si Cristina Bucsa naman sang Espanya nga amo ang naglutos sa iya sa Round 2 ang nagapang-72 na subong nga may 915 points halin sa nauna nga rank sini nga No. 95.
Si Eala amo ang una nga player halin sa Pilipinas nga nakadaog sa hampang sa main draw sa Grand Slam. Ang iya ginpierde sa 1st round amo si World No. 15 kag 14th-seeded nga si Clara Tauson sang Denmark, 6-3, 2-6, 7-6 (13-11).
Ang US Open amo ang katapusan nga Slam subong nga season.
Sa Septyembre 8-14, magahampang naman si Eala sa main draw sang 2025 Sao Paulo Open sa Brazil.#
