𝗜𝗟𝗢𝗜𝗟𝗢 𝗖𝗜𝗧𝗬 – Gin-ako sang Iloilo City Government nga atrasado ang ila paghatag ang allowance sa mga delagado nga nagpasakop sa Iloilo Schools Sports Council (Integrated) Meet kag Western Visayas Regional Athletics Association (WVRAA) Meet 2024.
Sa interview sang Bombo Radyo kay Joy Fantilaga, spokesperson ni Iloilo City Mayor Jerry Treñas, iya ginpahayag nga ang mga delegado lang sa Palarong Pambansa ang nakabaton sang budget antes ang hinampang sa Cebu City sang Hulyo 9 tubtob 16.
Suno kay Fantilaga, ₱19,800 ang nabaton sang kada coach, chaperone kag atleta sang Hulyo 1 tubtob 2.
Sa nasambit nga mga delagado, 41 ang halin sa public school kag 66 naman sa private school.
Samtang, ang allowance naman sang mga nagapasakop sa Iloilo City Sports Development Division Meet nga ginpatigayon sang Pebrero 22 tubtob 25 ang na-release lang sang Hulyo sa 3,500 ka mga benefeciaries.
Ang kada atleta kag coaches ang nagbaton sang ₱1,000, samtang wala pa nabakaton sang allowance ang mga technical officials.
Ang ₱8,472 nga allowance naman sa Integrated Meet nga ginpatigayon sang Marso ang wala pa nahatag sa 739 ka coaches, chaperone kag atleta bangud wala pa na-comply sang local school board ang mga kinahanglanon nga dokumento.
Sa WVRAA naman nga ginpatigayon sang Mayo, pending pa ang paghatag sang allowance bangud bag-o lang nagpasa sang requirements ang DEPED.
₱5,700 ang mabaton sang 138 ka mga atleta kag coaches sa private schools kag ₱21,998 naman para sa public schools sa 72 ka mga coach, chaperone kag atleta.
