Nagtaliwan na sa edad nga 53-anyos ang Hollywood actress nga si Shannen Doherty, ang ginbansagan nga “the iconic ‘bad girl’ of the nineties” nga kilala man sa TV series nga “Beverly Hills”, “90210” kag “Charmed”.
Suno sa publicist sini nga si Leslie Sloane, napatay ang aktres matapos ang tinuig man nga pagpakigbato sa balatian nga cancer.
2015 sang ginkumpirma sini nga nagasuprer siya sang breast cancer apang sang nagligad nga mga tinuig, gin-report nga may tumor nga ginkuha sa iya nga utok kag naglapta na ang cancer sa iya mga tul-an.
Madumduman nga nangin popular si Doherty sang nakaupod ini sa cast sang 90’s TV show nga “90210,” bilang si Brenda kun sa diin yara man sanday Luke Perry (bilang si Dylan McKay) kag Jennie Garth (bilang si Kelly Taylor).
Yara man siya anay sa hit supernatural TV series sang 1998 nga “Charmed” kun sa diin gindala sini ang papel ni Prue Halliwell.
Nangin agaw-atensyon man pati ang lovelife sini matapos nga tatlo ka beses nga ginkasal kun sa diin ang pinakaulihi ang nagtapos man sa diborsyo sang 2023.
