Ginmanduan sang Department of the Interior and Local Government (DILG) ang tanan nga mga opisina sini kag ang tanan nga local government units (LGUs) sa pungsod nga kakason ang mga pangalan kag mga laragway sang public officials sa tanan nga mga proyekto nga ginpondohan sang gobyerno.
Gindagdag ang mandu sa tanan nga provincial, city, municipal, kag barangay officials, amo man sa DILG central, regional, kag field offices kag attached agencies.
Dapat siguruhon suno sa ahensya nga wala sang pangalan, picture, logo, initials, color motif, slogan, ukon anuman nga identifying symbol sang mga public official nga nakatapik ukon nakasulat sa mga project signages, markers, tarpaulins, kag kaangay nga mga materyales kun ini nga mga proyekto ang naghalin man sa kuwarta sang taxpayers.
Suno sa DILG, indi personal nga mga billboard ang mga programa sang gobyerno, bangud ginpondohan ini sang kuwarta sang pumuluyo.
“Government programs are not personal billboards. These are funded by taxpayers and must reflect public service, not political credit-grabbing,” dugang sini.
Ginbutang sa statement sang DILG ang DILG Memorandum Circular No. 2026-006 nga napetsahan sang Enero 29. Ginsapubliko ini kahapon, Enero 30.
“All concerned officials and employees are directed to cause the immediate removal and correction of non-compliant materials,” suno pa sa DILG.
Ginmanduan man ang mga pinuno sang mga opisina para sa pagsigurado nga may compliance sa sini nga direktiba.
Ini nga tikang ang kabahin sang pagpasangkad pa sang Anti-Epal policy.
Ginsulit man sang DILG ang panawagan ni President Ferdinand Marcos Jr. nga dapat hilway ang government projects sa political self-promotion kag personality branding.
Gin-engganyo man ang mga pumuluyo nga i-report kun may nakit-an nga nagalapas sa sini nga pagsulundan.
