ILOILO CITY – Naggamay ang mga traffic violator nga nadakpan sa Synchronized Intensified Enforcement nga ginpatigayon sang nanari-sari nga ahensya sang gobyerno.
Santo sa data, naglab-ot sa anum ka salakyan ang gin-impound sa 216 ka motor vehicles nga gin-usisa sang mga tiglawas sang Regional Highway Patrol Team 6, Department of Public Works and Highways, Department of Environment and Natural Resources, Iloilo City Police Office kag Public Safety and Transportation Management Office.
Sa interview sang Bombo Radyo kay Jonas Torres, Field Enforcement Division officer sang Land Transportation Office 6, iya ginpahayag nga naggamay ang apprehension subong bangud nga una na nga nabalahuba nga may yara sang patigayunon nga One Time Big Time Operations.
Suno kay Torres, lauman nga indi lamang One Time Big Time Operations ang patigayunon kundi ini ang mangin tayuyon na agud nga mahagan-hagan ang nagakatabo nga aksidente sa dalanon.
Ginpahayag ni Torres nga lakip sa mga lugar nga ginpatigayunan sang Synchronized Intensified Enforcement sa Iloilo amo ang:
-Brgy. Buntatala sa distrito sang Jaro
-Distrito sang Molo
-Diversion Road sa distrito sang Mandurriao
-pila ka mga banwa sa probinsya sang Iloilo kasubong sang Dumangas, Zarraga kag Pavia
Ang mga nasambit nga lugar suno sa natungdan ang gina-agyan sang madamu nga salakyan sa tagsa ka adlaw apang bangud nga nabalahuba ang
tuhoy sa Synchronized Intensified Enforcement, ang iban sa mga driver ang wala na nagbiyahe samtang ang iban naman ang nangin compliant na sa traffic rules and regulations.
Samtang, ang isa sa anum ka mga gin-impound nga salakyan amo ang Ford Mustang sa diin ang tag-iya ang nakitaan sang madamu nga traffic violations.
Ginapahayag nga ang salakyan ang wala sang rehistro kag wala man sang dala nga OR/CR ang driver nga wala na ginhingadlan pa.
Santo sa record sang ahensya, ang driver sang Ford Mustang ang nakitaan man sadto sang violations apang wala niya ginhitso ang requirements.
Bangud sini, isa ka tuig nga suspension ang ginhatag nga silot sa nasambit nga driver.
