Ginkumpirma sang Leganes Municipal Police Station nga natugyan na sa otoridad ang isa sa duha ka mga menor de edad nga ginaalegar may kahilabtanan sa pagpatay sa lalaki nga nasapwan sa pavilion sang Leganes Plaza.
Sa interview sang Bombo Radyo kay Police Corporal Joefel Amihan, imbestigador sang Leganes Municipal Police Station, iya ginpahayag nga ang nag-surrender amo si Alias Bugoy, 15-anyos.
Nadala ini sa Leganes MPS matapos nakontak sang mga pulis ang tiya sini nga residente sang Jaro, Iloilo City.
Matandaan nga kaina sang kaagahon nga nadakpan ang 19-anyos nga suspek nga si alias Mark nga amo ang ginatudlo nagpangamot gid sa krimen sa pagpatay kay Jhomel Alejandro, 29, residente sang Kalibo, Aklan, apang naga-trabaho sa Iloilo City.
Sa imbestigasyon suno sa pulis, sang nag-umpisa na ang pagpanakit ni alias Mark, sandig sa testimoniya sang mga testigo, nagsunod ang duha ka menor de edad kag nag-amot sa pagsumbag kag pagsipa.
Suno kay Amihan, gin-turn over na sa Department of Social Welfare and Development (DSWD) si alias Bugoy.
Sa record sang Leganes MPS, wala sang record sang amo nga menor, apang suno kay Amihan, may mga reklamo nga nagaalegar nga involved sila sa mga rambol sa plaza.
Sa imbestigasyon sang pulis, konektado si alias Bugoy sa grupo nga 2-1-3.
May nakamuno suno kay Amihan nga si alias Bugoy mismo amo ang nagatindog nga lider-lider sang 2-1-3, apang wala pa sang mahatag nga dugang nga detalye sa amo nga grupo.
Madumduman nga base sa imbestigasyon sang mga kapulisan kag sa bulig sang duha ka mga testigo nga upod man sang mga suspek sang natabo ang krimen, pagpang-tripping ang nangin rason sang krimen.
Base sa mga testigo, ululupod sila nga lima nga nag-inum-inom sa nasambit nga plaza kun sa diin ginsaway sang biktima ang mga suspek bangud nga magahod ang mga ini kag nagakatulog siya sa ibabaw sang pavilion.
Sang nagbalik sa ibabaw ang biktima, didto nagpahayag si alyas Mark sa iya kaupdan nga trippingan ang biktima.
Gin-alegar nga gintinguhaan pa sang duha ka witnesses nga punggan ini apang wala nagpati kag didto na natabo ang krimen mga pasado alas-tres sang kaagahon sang Abril 8.
Nahibaluan man sa imbestigasyon nga naga-trabaho bilang cashier ang biktima sa Jaro, Iloilo City, apang may natabo nga indi-paghangpanay sa amo sini rason nga nagpadulong ini sa banwa sang Leganes kag didto nagtulog sa ibabaw sang pavilion sa sulod sang pila ka adlaw antes natabo ang krimen.#
